O versátil internacional serbio Sub-21 asina polas próximas 5 tempadas
O RC Celta pechou hoxe a contratación do centrocampista defensivo Nemanja Radoja, que será xogador celeste as próximas 5 tempadas. Internacional coa selección serbia Sub-21, Radoja chega ao conxunto celeste procedente do FK Vojvodina, equipo no que exercía de capitán.
Nemanja Radoja (1993, Novi Sad, Serbia) é un prometedor e versátil futbolista serbio que destaca na posición de pivote, aínda que pode ocupar outras demarcacións da liña defensiva. Formado na canteira do FK Vojvodina, un dos principais clubs da Superliga Serbia, Radoja iniciou a súa carreira profesional con cesións no CSK Pivara e o FK Cement.
Na 2012-2013 o futbolista serbio regresou ao seu club de orixe para converterse nun dos xogadores habituais no once titular. No FK Vojvodina acumulou 47 partidos ligueiros en dúas tempadas, ademais de levantar o título de campión da Copa de Serbia 2014.
Radoja foi convocado polas seleccións serbias Sub-17, Sub-19 (coa que participou na Eurocopa 2012) e Sub-21.
Os afeccionados poderán asistir á presentación de Radoja en Balaídos accedendo pola porta 24 do estadio (bancada de Gol).