Abanca Balaídos acolleu esta mañá a rolda de prensa de presentación de David Ferreiro como novo adestrador de As Celtas. O técnico vigués estivo acompañado por Sergio Álvarez, conselleiro vinculado ao proxecto, e por Humberto Lede, coordinador de As Celtas, quen lle deron unha calorosa benvida na súa primeira comparecencia como técnico celeste.
Ferreiro mostrou o seu agradecemento pola oportunidade e pola confianza depositada polo club, deixando claro que ten moitas ganas de comezar e “a cabeza pensando xa na próxima tempada”.
O técnico vigués repasou, durante a súa comparecencia ante os medios, a evolución do proxecto nos últimos cursos, explicando detalladamente como As Celtas está “medrando moitísimo, conseguindo ascensos e formando xogadoras. Creo que iso tamén é moi importante e hai que seguir nesa liña. Agora tócame un papel de rendemento, no que haberá que competir e formar ao mesmo tempo”.
Sobre o traballo destes primeiros días co plantel, definiu este momento como “o pre da pretempada; importante para introducir contidos e que, cando volvan do verán, as xogadoras lembren cousas. Este tempo é para mantelas activas e acelerar procesos de cara ao inicio do novo curso”.
Por último, expuxo o seu coñecemento previo do club como unha das súas grandes bazas, valorando a bagaxe acumulada como unha vantaxe á hora de afrontar este reto. “Levo dous anos aquí e xa coñezo a estrutura, e iso dame ferramentas para poder traballar mellor”, explicou David, que afronta esta nova etapa con ilusión e ambición.
Dálle ao play e non perdas todas as súas declaracións!
